Kritische Theorie

As Kritischi Theorii wird e Gsellschaftstheorii bezäichnet, wo vom Hegel, Marx und Freud inspiriert isch und wo Verdräter von ere under em Begriff Frankfurter Schuel zämmegfasst wärde. Si befasst sich mit dr kritische Analüüse vo dr bürgerlig-kapitalistische Gsellschaft, das häisst mit em Ufdecke vo iire Herrschafts- und Underdrückigsmechanisme und mit dr Entlarvig vo iire Ideologie, mit em Ziil von ere vernümftige Gsellschaft vo mündige Mensche.

Im Middelpunkt vo dr Kritische Theorii vo dr Frankfurter Schuel stoot die ideologiikritischi Usenandersetzig mit de gsellschaftlige und historische Bedingige vo dr Theorii­bildig und e Kritik an de gsellschaftlige Verheltniss, wo mit ene vermittlet wird. D Theorii wird aber as e Form vo dr Braxis aagluegt, wil si drvoo reedet, ass es nöötig isch die Verheltniss z verändere.